ننګرهار ولایت د افغانستان د ۳۴ ولایتونو له جملې یو له هغو ولایتونو څخه دی، چې خلک یې، په ځانګړي ډول ځوانان یې د نورو بوختیاو ترڅنګ له ورزش سره ځانګړې مینه لري او په بېلابېلو ورزشي رشتو کې پر تمریناتو بوخت دي.
د دغه ولایت ورزش ریاست د تېر په څېر په ۱۴۰۴ کال کې هم د ورزش په برخه کې د افغانستان د المپیک، بدني روزنې او ورزش عمومي ریاست په کلک ملاتړ غوره فعالیتونه ترسره کړي دي او زیات شمېر سترې او کوچنۍ ورزشي برنامې یې ترسره کړې دي.
په دغه ولایت کې ورزش ورځ تر بلې د غوړېدا او پرمختګ په حال کې دی او زیات شمېر ځوانان یې په کرېکټ، والیبال،فوټبال، د بدن ښکلا او نورو ورزشونو کې مصروف دي او ورزش یې د خپل ژوند برخه ګرځولې ده.
په ننګرهار کې د بېلابېلو فدراسیونونو ۲۳ استاوزلۍ فعاليت کوي، چې د جودو، پانکرېشن او پاورلفټینګ استازولیو پکې سږ کال فعالیت پیل کړی دی.
په یاد ولایت کې د بېلابېلو رشتو (۲۵۰) کلبونه موجود دي، چې شاوخوا ۲۲۰۰۰ ورزشکاران پکې د خپلې سلامتیا او روښانه راتلونکي لپاره خولې تویوي.
په ۱۴۰۴ هجري لمریز کال کې د دې ولایت په مرکز جلال اباد او ولسوالیو کې د یاد ولایت د بدني روزنې او ورزش ریاست له لوري ۳۱۸ المپیکي او غیر المپیکي ورزشي برنامې جوړې شوې دي ، چې ۱۴۳ یې په مرکز او ۱۷۸ یې بیا په ولسوالیو کې دایرې شوې.
همدارنګه په دغه ولایت کې ۴۱۵ ورزشکارانو، استادانو، روزونکو او مسوولینو ته د دعوت او ارشاد د فکري روزنې اصلاحي سمینار، ۷۸ ورزشکارانو ته د سوکوهنې او ۷۶ تنو ته بیا د بدن ښکلا سمینارونه برابر شوې دی.
دا چې د دغه ولایت خلک له ورزش سره ځانګړې مینه لري، وخت نا وخت پکې لويې او کوچنۍ ورزشي جشنوارې جوړېږي، چې د خراسان پوهنتون د ورزش اوونۍ جشنواره، د والیبال ټاکنیزو سیالیو برنامه، له ۲۰ ولایتونو څخه د ۲۰۰ ورزشکارانو ترمنځ د رزمي ورزشونو سیالۍ او د یاد ولایت د فوټبال غوره لیګ سیالۍ یادولی شو.
په ننګرهار ولایت کې د نورو ورزشونو په پرتله کرېکټ او والیبال زیات مینهوال لري او زیات شمېر لوبغاړي په دغو دوو رشتو کې په تمریناتو او سیالیو بوخت دي، چې یو شمېر لوبغاړو یې د دې رشتو ملي لوبډلو ته لاره موندلې ده.
پر دې سربېره د پهلوانۍ او سوکوهنې ورزش هم په ننګرهار ولایت کې خپله ريښه پراخه کړې او زیات شمیر ورزشکاران او مینوال لري، چې وخت نا وخت یې سترې سیالۍ د ننګرهار ولایت د بدني روزنې او ورزش ریاست له لوري برابريږي او ګڼ شمېر ورزشکاران او مینوال پکې برخه اخلي.
