د ورزش ادارې او NOVE Caring Human مؤسسې ترمنځ د همکاري هوکړه لاسلیک شو

د المپیک، بدني روزنې او ورزش عمومي ریاست او NOVE Caring Human اېټالوي مؤسسې ترمنځ د بامیان ولایت د ورزشي جمنازیوم د بیا رغونې په برخه کې د همکاري ګډ هوکړه لیک لاسلیک شو.

د یاد هوکړه لیک د لاسلیک پر مهال د المپیک، بدني روزنې او ورزش عمومي رئیس له یادې مؤسسې مننه وکړه، چې افغانستان کې د ورزش په برخه کې دوامدار کار کوي. ښاغلي وثیق ورزش یوه غیر سیاسي برخه وبلله او زیاته یې کړه، چې ورزش تل ملتونه، قومونه او آن هېوادونه له یو بل سره یو ځای کړي دي. دغه راز ښاغلي وثیق زیاته کړه، چې معلول ورزشکاران د ژوند له یو شمېر برخو څخه محروم دي، نو دوی ته پاملرنه د اهمیت وړ ده.

همداراز د یادې مؤسسې مشر البرت کایرو ورزش د ژوند یو مهم اصل وباله او زیاته یې کړه، چې هڅه کوي په افغانستان کې د معلولو خلکو او ورزشکارانو لپاره لا زیاتې آسانتیاوې برابرې کړي.

د یادونې وړ ده، چې د بامیان ولایت د بدني روزنې او ورزش اړوند ورزشي جمنازیوم د بیا رغونې چارې به د یادې مؤسسې له لوري د ۲۵ زره ۵۰۰ امریکايي ډالرو په ارزښت ترسره شي، چې معلولو ورزشکارانو ته به د لوبو او تمرین کولو ښه زمینه برابره کړي.

دا په داسې حال کې دی، چې NOVE Caring Human اېټالوي مؤسسه له ۳۶ کالونو راهیسې په افغانستان کې د معلولیت لرونکو خلکو لپاره کار کوي او د هېواد په بېلابېلو ولایتونو کې یې د معلولو ورزشکارانو لپاره ورزشي اماکن جوړ کړي دي.