ننگرهار کې د ۵۰ ورزشکارانو ترمنځ د پانکريش سيالۍ وشوې
د ننگرهار ولايت د بدني روزنې او ورزش ریاست په همکارۍ، د پانکريش فدراسيون د استازولۍ له لوري د ياد ولايت په مرکز جلال آباد ښار کې د پنځو ولايتونو ۵۰ ورزشکارانو ترمنځ د پانکريش سيالۍ وشوې.
په يادو سياليو کې له کابل، مزارشريف، کونړ، لغمان او کوربه ننگرهار ولايتونو څخه د نويو ځوانانو، ځوانانو او لويانو په عمري کټگوریو کې د يو بل پر وړاندې سیالۍ ترسره کړې، چې په پايله کې يې ۲۵ تنو خپلو سيالانو ته په ماتې ورکولو سره برياوې خپلې کړې.
دا سیالۍ راتلونکو لوبو ته د ورزشکارانو د لا ښه چمتوالي په موخه وشوې، چې يوه ورځ يې دوام وکړ.
