کندز؛ علي آباد ولسوالۍ کې د فوټبال ليگ سيالۍ پای ته ورسېدې
د کندز ولايت د بدني روزنې او ورزش ریاست په همغږۍ، د فوټبال فدراسيون د استازولۍ له لوري د ياد ولايت په علي آباد ولسوالۍ کې د ۱۵ لوبډلو ترمنځ د فوټبال الف ليگ سيالۍ، چې شاوخوا درې مياشتې مخکې پيل شوې وې پای ته ورسېدې.
د يادو سياليو په پايله کې اتحاد قزل سايي لوبډلې د ۴۰ امتيازونو په خپلولو سره لومړی، پيروزي ځوانانو لوبډلې د ۳۲ امتيازونو په ترلاسه کولو سره دويم مقامونه خپل کړل او د علي آباد ولسوالۍ غوره ليگ ته يې لار پېدا کړه.
د ويلو ده، چې په ورته وخت کې يادې ولسوالۍ کې د اتو لوبډلو ترمنځ د فوټبال ب ليگ سيالۍ د عقابان دره يوسف په لومړي او شفيق بنياد لوبډلې په دويم مقام پای ته ورسېدې او دواړو لوبډلو الف ليگ ته لار ومونده.
