غزني؛ اتحاد میري لوبډله د اندړو ولسوالۍ د فوټبال سیالیو اتلولي وګټله
د غزني ولایت د بدني روزنې او ورزش آمریت اړوند د فوټبال فدراسیون د استازولي له لوري د یاد ولایت په اندړو ولسوالۍ کې د کوچني اختر په مناسبت د فوتبال سیالۍ چې درې اوونۍ مخکې د ۱۴ لوبډلو په ګډون د میري بازار په ورزشي لوبغالي کې پیل شوې وې، د اتحاد میري لوبډلې په اتلولي پای ته ورسېدې.
د یادو سیالیو پای لوبه د اتحاد میري او بریم اتلانو لوبډلو ترمنځ ترسره شوه، چې په پایله کې اتحاد میري لوبډلې د ۱-۰ ګول په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
دغه سیالۍ د ورزش کارانو د هڅولو په موخه ترسره شوې او په پای کې اتلې لوبډلې ته د اتلولي کپ او غوره لوبغاړو ته بېلابېلې ډالۍ ورکړل شوې.
