پکتيکا؛ په زيړوک ولسوالۍ کې د ۳۸ لوبډلو ترمنځ د ټېپ بال کرکټ سيالۍ پای ته ورسېدې
د پکتيکا ولايت د بدني روزنې او ورزش امريت په همغږۍ د زيړوک ولسوالۍ په ورژاڼه کلي کې د ۳۸ لوبډلو ترمنځ د اختریز جام په نوم د ټېپ بال کرکټ سيالۍ د عصمت الله لوبډلې په اتلولۍ پای ته ورسېدې.
د يادو سياليو پايلوبه د عصمت الله او جاويد لوبډلو ترمنځ ترسره شوه، عصمت الله لوبډلې د لوبې پچې په گټلو سره په ټاکلو ۱۲ اورونو کې سيالې لوبډلې ته د ۹۵ منډو هدف کېښود، جاويد لوبډلې ياد هدف ترلاسه نه کړ او د ۲۷ منډو په توپير يې ماته ومنله.
دغه سيالۍ، چې شاوخوا دوې اوونۍ يې دوام وکړ، په پای کې د ياد ولايت د ورزش امريت له لوري لومړي او دويم مقام گټونکو لوبډلو ته کپونه، مډالونه، او غوره لوبغاړو ته چمتو شوې ډالۍ ورکړل شوې.
