کونړ؛ آسمار ولسوالۍ کې د ۲۰ لوبډلو ترمنځ د ټېپ بال کرېکټ سيالۍ پای ته ورسېدې
د کونړ ولايت د بدني روزنې او ورزش آمريت اړوند د ټېپ بال کرېکټ فدراسيون د استازولۍ له لوري د آسمار ولسوالۍ په زربټ ډاگ سيمه کې د ۲۰ لوبډلو ترمنځ د ټېپ بال کرېکټ سيالۍ، چې شاوخوا يوه مياشت يې دوام وکړ د کرهالې لوبډلې په اتلولۍ پای ته ورسېدې.
د دغو سياليو پايلوبه د کرهالې او دوبۍ لوبډلو ترمنځ ترسره شوه. د لوبې پچه کرهالې لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د درېيو لوبغاړو په سوځېدو سره سيالې لوبډلې ته د ۱۳۴ منډو هدف وټاکه، په مقابل کې دوبۍ لوبډلې د ټولو اورونو په لوبولو سره يواځې ۹۹ منډې وکړې او لوبه يې د ۳۵ منډو په توپير وبايلله.
د ويلو وړ ده، چې د دغو سياليو موخه په يادې ولسوالۍ کې د ټېپ بال کرېکټ لوبې ته وده ورکول و.
