خوست؛ صبريو يعقوبو ولسوالۍ کې د ټېپ بال کرېکټ سيالۍ پيل شوې
د خوست ولايت د بدني روزنې او ورزش آمريت په همکارۍ او د ټېپ بال کرېکټ فدراسيون د استازولۍ له لوري د صبريو يعقوبو ولسوالۍ اړوند زمبر سيمه کې د ۵۰ لوبډلو ترمنځ د ټېپ بال کرېکټ سيالۍ پيل شوې.
د يادو سياليو پليزه لوبه د عليشېرو للمۍ ټايگر او نورالقلم لوبډلو ترمنځ ترسره شوه، د لوبې پچه عليشېر للمۍ ټايگر لوبډلې وگټله او لومړی يې د توپ وهنې پرېکړه وکړه، چې په ټاکلو ۵ اورونو کې يې د ۴ لوبغاړو په سوځېدو سره خپلې سيالې لوبډلې ته د ۶۹ منډو هدف وټاکه، په ځواب کې نورالقلم لوبډلې ياد هدف په ۵م اور کې ترلاسه کړ او لوبه يې د ۶ ویکټو په توپیر وگټله.
د يادونې وړ ده، چې دغه سيالۍ به شاوخوا دوې مياشتې دوام وکړي.
