میدان وردګ؛ دایمیرداد ولسوالۍ کې د ۳۲ لوبډلو ترمنځ د ټېپ بال کرکټ سیالۍ پای ته ورسېدې
د میدان وردګو ولایت د بدني روزنې ا و رزش امریت اړوند د ټېپ بال کرکټ فدراسیون د استازولي له لوري د یاد ولایت د دایمیرداد ولسوالۍ جلګې سیمه کې د ۳۲ لوبډلو ترمنځ د ټېپ بال کرکټ سیالۍ د چنګې بازانو لوبډلې په اتلولي پای ته ورسېدې.
د یادو سیالیو پایلوبه د چنګې بازانو او ګلدره سټار لوبډلو ترمنځ ترسره شوه، چې ګلدره سټار لوبډلې په ټاکلو اتو اورونو کې خپلې سیالې لوبډلې ته د ۸۸ منډو هدف وټاکه. چنګي بازانو لوبډلې یاد هدف د لوبې په وروستي اور کې ترلاسه کړ او د اتو ویکټو په توپير یې بریا خپله کړه.
یادې سیالۍ د ځوانانو ترمنځ د مینې او محبت فضأ رامنځته کولو په موخه ترسره شوې او په پای کې اتلې لوبډلې ته د اتلولي کپ او لوبغاړو ته ستاینلیکونه ورکړل شول.
