کابل؛ یما پټرول او سرپل لوبډلې د وزلوبې شپږم پړاو سیالیو پایلوبې ته لار ومونده
د المپیک، بدني روزنې او ورزش لوی ریاست اړوند د وزلوبې او نیزه وهنې ملي فدراسیون له لوري د وزلوبې او نیزه وهنې شپږم پړاو غوره لیګ سیالۍ چې نهه ورځې مخکې په پلازمېنه کابل کې پیل شوې دي، یما پټرول او سرپل لوبډلې د دغو سیالیو پایلوبې ته لار ومونده.
د دغو سیالیو په لومړۍ نیمه پایلوبه کې یما پټرول لوبډلې له یوې هر اړخیزې او جالبې لوبې وروسته د ۶ پر ۳ نمرو په توپیر خپلې سرسختې سیالې بدخشان لوبډلې ته ماتې ورکړه او په دویمه نیمه پایلوبه کې بیا سرپل لوبډلې د ۶ پر صفر نمرو په توپیر د فاریاب ځوانانو لوبډلې ته ماتې ورکړه او د دغو سیالیو پایلوبې ته یې لار ومونده.
ټاکل شوې، چې د یادو سیالیو پایلوبه به د راتلونکې دوشنبې په ورځ د کابل په یکه توت میدان کې ترسره شي.
