کابل کې د ورزش ادارې ۱۱ فدراسیونونو مسوولینو او ورزشکارانو ته د دعوت او ارشاد ریاست له لوري اصلاحي سمینار پيل شو
کابل کې د هېواد ورزش ادارې اړوند د دعوت او ارشاد ریاست له لوري د یاد ریاست جودو، بسکټبال، جمناستیک، بډمنتون، اتلتیک، زورخانه یي، پانکرېشن، تکواندو، کاراټې، کڼو (ناشنوایان) او د باتورانِ دود ، ۱۱ ورزشي فدراسیونونو مسوولینو او ورزشکارانو ته اصلاحي سمینار پيل شو.
د دغه سمینار د پيل په مراسمو کې د المپيک، بدني روزنې او ورزش عمومي رییس مولوي احمد الله وثیق، د یاد ریاست مالي او اداري رییس مولوي عبدالناصر هاشمي او د یاد ریاست د دعوت او ارشاد رییس مولوي داد محمد بریال عطایي ګډون کړی و.
د دغه سمینار د پيل په مراسمو کې د المپیک، بدني روزنې او ورزش عمومي رییس مولوي احمد الله وثیق وویل: د الله ج راضي کېدل اسانه کار نه دی او له تاسو څخه مو هیله ده، چې دغه سمینار کې ګډون وکړئ او د دعوت او ارشاد ریاست کتاب مطالعه کړئ. موږ د داسې استعدادونو په لټه کې یو، چې په راتلونکې کې د افغانستان په استازولۍ په نړیوالو سیالیو کې ولوبیږي او د هېواد مثبت کلتور نړۍ ته وښایي.
په یاد سمینار کې د یادو فدراسینونو ۲۱۰ مسوولنیو او ورزشکارانو ګډون کړی دی، چې درې ورځې به دوام وکړي.
