هلمند؛ ناوې ولسوالۍ کې د ۱۶ لوبډلو ترمنځ د فوټبال سيالۍ پای ته ورسېدې
د هلمند ولايت د بدني روزنې او ورزش آمريت اړوند د فوټبال فدراسيون د استازولۍ له لوري د ناوې ولسوالۍ په تبيلې سيمه کې د ۱۶ لوبډلو ترمنځ د فوټبال سيالۍ، چې دوې اوونۍ مخکې پيل شوې وې د پوپل ځواک لوبډلې په اتلولۍ پای ته ورسېدې.
د يادو سياليو پايلوبه د پوپل ځواک او بولان ځوانانو لوبډلو ترمنځ ترسره شوه، چې په ټاکلي وخت سيالي ۰/۰ مساوي پای ته ورسېده، خو په پنالټيانو کې پوپل ځواک لوبډلې خپلې سيالې لوبډلې ته د ۳/۴ گولونو په توپير ماتې ورکړه او اتلولي يې وگټله.
د ويلو وړ ده، چې د دغو سياليو موخه ورزش ته د ځوانانو هڅول او د يادې ولسوالۍ وگړو لپاره د سالمې تفريح برابرول وو.
