خیبر ولي څنګه له کريډېټ پلورلو تر نولس کلنو لوبډلې راورسېد؟
خیبر ولي هغه لوبغاړی دی چې ملي لوبډلې ته د رسېدو په هيله اتهه کاله د جلال اباد ښار د کرکټ په ميدانونو کې ولوبېد.
نوموړي به د ورځې د دې ولایت په میدانونو کې په کرکټ ځان ستړی کړ او د شپې به يې د سړک پر سر د مبایل کريډېټ کارتونه پلورل.
هغه د ننګرهار ولایت د چپرهار ولسوالۍ د کنډي باغ کلي اوسېدونکی دی او اوس مهال ٍيې د افغانستان ۱۹ کلنو لوبډلې اسیايي جام سیالو کې د ګډون لپاره لار موندلې.
نوموړی وايي: هیله لري چې د ا فغانستان کرکټ ملي لوبډلې ته لار پیدا کړي، هغه زیاتوي چې ملي لوبډلې ته د لار موندولو او له کرکټ سره لېونۍ مينې دې ته اړایستی و چې د ورځې کرکټ وکړي او خپلې کورنۍ ته د نفقې برابرولو لپاره د سړک پر سر کريډېټ وپلوريٍ.
د نوموړي په خبره اوس مهال چې د ۱۹ کلنو لوبډلې سره یوځای شوی دې ډېر خوښ دی او خپله هڅه به کوي چې ځان د هيواد تر ملي لوبډلې ورسوي.
د ۱۹کلنو اسیايي جام سیالۍ به د روانې ډسمبر میاشتې په ۱۹مه په متحده عربي اماراتو کې پیل شي. په دې اسیايي جام کې د افغانستان په ګډون د هندوستان، پاکستان، سرېلانکا، بنګلهدېش، کویټ، نيپال او د متحده عربي اماراتو لوبډلې ګډون کوي.
هېره دې نه وي چې له اسیا جام وروسته د افغان ۱۹کلنو لوبډله ویسټ انډیز ته ځي او د ۱۹کلنو په نړیوال جام کې ګډون کوي چې افغان ۱۹ کلنه لوبډله د نړیوال جام په C ګروپ کې له پاکستان، زمبابوې او پي.این.جي سره لوبې لري.
