کابل؛ د ورزش ادارې عمومي رئيس مولوي احمدالله وثیق د MDC روغتيايي مرکز له مسؤل سره وليدل
د المپيک، بدني روزنې او ورزش عمومي رئيس مولوي احمدالله وثیق د MDC روغتيايي مرکز مسؤل ډاکټر بلال حکيمي او مل پلاوي سره وليدل او له ورزشکارانو سره په صحي برخه کې يې د همکارۍ په اړه خبرې وکړې.
په دغه ليدنه کې د هیواد ورزش ادارې عمومي رئيس مولوي احمدالله وثیق دوی ته د ښه راغلاست ترڅنګ، هېوادوالو ته د دوی د روغتيايي خدمتونو پر وړاندې کولو خوښي وښوده او د هېواد ورزش ادارې د کارکونکو او ورزشکارانو په اړه يې معلومات ورکړل.
دغه راز د MDC روغتيايي مرکز مسؤل ډاکټر بلال حکيمي د خپلو فعاليتونو ترڅنګ وويل، دا چې موږ له بېلابېلو بنسټونو سره په صحي برخه کې د همکارۍ تړونونه لرو، نو ومو غوښتل خپلو ورزشکارانو ته هم په صحي برخه کې خدمت وکړو او يو تړون ولرو.
د دې ليدنې په پای کې په دې پرېکړه وشوه، چې په راتلونکې کې به د دواړو لورو ترمنځ د ګډې همکارۍ يو تړون لاسليک شي، چې له مخې به يې د هېواد ورزش ادارې اړوند کارکوونکو او ورزشکارانو ته صحي خدمات په تخفيف سره وړاندې کېږي.
