خوست؛ په يعقوبيو صبريو ولسوالۍ کې د شپږو لوبډلو ترمنځ د ټېپ بال کرکټ سيالۍ پيل شوې
د خوست ولايت د بدني روزنې او ورزش امريت اړوند ټېپ بال کرکټ فدراسيون د استازولۍ له لوري په يعقوبيو صبريو ولسوالۍ کې د شپږو لوبډلو ترمنځ د صحراوال غوره ليګ ټېپ بال کرکټ سيالۍ پيل شوې.
د دغو سياليو لومړۍ لوبه د صحرا اتلانو او صحرا ټایګرز لوبډلو ترمنځ وشوه، لومړی توپوهنه صحرا اتلانو لوبډلې وکړه او په ټاکلو اتو اورونو کې يې سيالې لوبډلې ته د اوو لوبغاړو په زيان ۱۰۸ منډې هدف کېښود، د لوبې په دويمه پاڼۍ کې صحرا ټايګرز لوبډلې ياد هدف د دوو لوبغاړو په زيان پوره کړ او په اتو ویکټو يې بريا خپله کړه.
هېره دې نه وي چې دغه سيالۍ د ليګ په شکل ترسره کېږي او يوه مياشت به دوام وکړي.
