کابل کې د ۴۰ ورزشکارانو ترمنځ د سوکوهنې سپايرينګ سیالۍ پيل شوې
د المپيک، بدني روزنې او ورزش عمومي ریاست اړوند د سوکوهنې ملي فدراسیون له لوري د هېواد له ۱۱ ولايتونو څخه د ۴۰ ورزشکارانو ترمنځ د تايلينډ په کوربتوب دسوکوهنې نړيوالو سياليو ته د ځوانانو کټګورۍ د ملي لوبډلې د سپايرينګ سیالۍ، د دې فدراسیون په جمنازيوم کې پيل شوې، چې دوه ورځې به دوام وکړي.
دغه سيالۍ، چې د ځوانانو کټګورۍ کې د تايلينډ په کوربتوب له ۱۹ کلنو کم عمره ځوانانو د سوک وهنې نړيوال فيوچر کپ سياليو ته د غوره ورزشکارانو د ټاکلو په موخه پيل شوې، په پای کې به يې ۴ تنه يادو سياليو کې د ګډون په موخه وټاکل شي، تر څو د افغانستان په استازولۍ په دغو سياليو کې ګډون وکړي.
ټاکل شوې، چې د تايلينډ په کوربتوب د ۲۰۲۶ د سوکوهنې له ۱۹ کلنو کم عمره ځوانانو نړیوال فيوچر کپ سيالۍ به د ياد هېواد په پلازمينه بنکاک ښار کې د افغانستان په ګډون د روان ميلادي کال د مارچ مياشتې پر ۶مه نېټه پيل شي، چې د همدې میاشتې تر ۱۸مې نېټې به دوام وکړي.
د ويلو ده، چې د ټايلنډ په کوربتوب يادې راتلونکې لوبې د ځوانانو المپيکې نړيوالو سياليو ته د لار موندنې په موخه ترسره کېږي.
