کابل؛ د رزمي ورزشونو فدراسيون ۹۰ روزونکو ته د اسلامي روزنې درې ورځنی روزنيز سمينار پيل شو
د کابل ولايت د بدني روزنې او ورزش رياست سره په همغږۍ د رزمي ورزشونو ملي فدراسيون له لوري د کابل ولايت ۹۰ روزونکو ته د «اسلامي روزنې» تر عنوان لاندې درې ورځنی روزنيز سمينار د المپيک ملي کمېټې د غونډو په تالار کې پيل شو.
په دغه سمينار کې به د رزمي ورزشونو د فني او مسلکي مرستيال استاد شاکر صابري له لوري برخه اخیستونکو روزونکو او استادانو ته د اسلام له نظره د روزنې اصول او د روزونکو او استادانو د مسؤلیتونو موضوعات په بشپړ ډول تشريح شي.
د دې سمينار د پيل پر مهال د هېواد ورزش ادارې د المپيکي چارو رئيس داد محمد پاينده اختري، خوښې وښوده، چې په دغه ډول برنامه کې چې د هېواد د ورزش د ودې او پرمختګ لپاره گټوره ده، گډون کوي او زیاته يې کړه، چې استادان او روزونکي بايد د خپلو شاگردانو په تربيه کې زيات کوښښ وکړي او د خپلو شاگردانو د روزنې پر مهال ټول اړخونه په نظر کې ونیسي، تر څو په راتلونکي کې دغه ورزشکار د ټولنې د خدمت مصدر وګرځي.
د ويلو ده، چې ياد سمينار د روزونکو په اسلامي روحیې د سمبالښت او د اسلام له نظره د روزنې پر اصولو د پوهیدو په موخه د هېواد د ورزش ادارې د المپيکي چارو رئیس داد محمد پاينده اختري، د رزمي ورزشونو رئيس استاد عبدالواسع قیومي او استادانو په شتون کې پيل شو، چې په پيل کې يې د قرآن عظيم الشان ختم هم ترسره شو.
