د وزلوبې ملي لوبډلې په کوکپر نړۍوالو سیالیو کې درېیم مقام خپل کړ
د افغانستان وزلوبې ملي لوبډلې د وزلوبې کوکپر نړۍوالو سیالیو کې، چې د قزاقستان په کوربه توب د نهو هېوادونو ترمنځ ترسره شوې؛ درېیم مقام خپل کړ.
په دغو سیالیو کې افغانستان، قزاقستان، ترکیې، منگولیا، روسیې، چین، مجارستان، ازبکستان او تاجیکستان هېوادونو ګډون کړی و، چې افغانستان په B ګروپ کې له مغولستان، مجارستاناو روسیې سره لوبې وکړې.
افغان ملي لوبډلې په ګروپي سیالیو کې مجارستان ته ١٤ پر صفر، مغولستان ٧ پر صفر او روسیې ته ۵ پر صفر ماتې ورکړې او د دغو سیالیو نیمه پایلوبې ته یې لار ومونده، خو په نیمه پایلوبه کې یې له ازبکستان څخه ٤ پر ٢ ماتې وخوړه او له مخکې تګ څخه پاتې شوه. مګر افغان لوبډلې د درېیم مقام پر سر روسیې ته د ٦ پر صفر نمرو په توپیر ماتې ورکړه او په یادو سیالیو کې یې درېیم مقام خپل کړ.
