د بدني روزنې او سپورت عمومي ریاست پلاوي په ایران کې د افغان ورزشکارانو ستونزې واورېدې
د احمد ناصر زاخیلي په مشرۍ پلاوي په دې وروستیو کې د مېشتو افغان ورزشکارانو د وضعیت د ارزونې په موخه ایران ته سفر کړی او په قم کې یې له افغان ورزشکارانو سره وکتل.
ښاغلي زاخېلي پر ټولو هغو ورزشکارانو غږ وکړ چې له هېواده وتلي دي او افغانستان ته دې راستانه شي او پرته له کوم خنډه په ورزشي فعاليتونو بوخت شي.
هغه د اصفهان، مشهد، شیراز او یزد او داسې نورو ښارونو ته خپلو سفرونو ته په اشارې سره وویل: په دغو سفرونو کې مو د مختلفو ورزشونو له استازو او ورزشکارانو سره وکتل او د هغوی ستونزې، نیوکې او وړاندیزونه مو واورېدل. پریکړه وشوه چې دا ټولې ستونزې به وڅیړي او د حل لپاره به یې هڅې وکړي.
دغه راز په دې کتنه کې د المپيک د ملي کمېټې د پلاوي غړو ښاغلي صافي او ښاغلي حسني د ورزشکارانو د ستونزو د حل ته اشاره وکړه او زياته يې کړه د قومونو يووالی په ټولو ډګرونو په تېره بيا د ورزش په ډګر کې د وياړ رامنځته کولو لپاره تر ټولو مهمه لار ده.
په دې غونډه کې د افغان ورزشکارانو او مخکښو د وړانديزونو پر بنسټ او په تهران کې د افغانستان سفارت په تفاهم او د هېواد د ورزش ادارې د مشرتابه په لارښوونه پرېکړه وشوه چې د دوشنبې په ورځ د کب په ۲۳ مه د افغانستان سفارت د کنفرانسونو په تالار د افغان لوبغاړو د عمومي استازي د ټاکلو لپاره د ورزشي فدراسیونونو د استازو په ګډون چې د مرکزي فدراسیونونو (کابل) څخه رسمي جواز لري یو کس د استازي په توګه برخه واخلي او ټاکنې ترسره کړي.
په دې ټاکنو کې ټولو مخکښ لوبغاړو او ورزشکارانو ته د ګډون حق ورکړل شوی دی.
