په لوګر کې د کبډلي ملي سياليو د غوراوي اتم پړاو اتلولي خوست لوبډلې وګټله
په لوګر ولايت کې د اتو لوبډلو ترمنځ د کبډي سياليو د غوراوي اتم پړاو اتلولي خوست لوبډلې وګټله.
دغه لوبې چې دوه ورځې مخکې پيل شوې وې، د ۸ ولايتونو لوبډلو پکې ګډون کړی و، د دغه سياليو پايلوبې ته د فراه او خوست لوبډلو لار موندلې وه چې خوست لوبډلې خپلې سيالې لوبډلې ته د ۳۸_۲۵ نومرو په توپير ماتې ورکړه او د يادو سياليو اتلولي يې خپله کړه، د يادو لوبو دويم مقام فراه او درېيم مقام لوګر لوبډلې په خپل نوم کړ.
د نوموړو سياليو پايلوبې ته د سپورټ رياست فني او مسلکي رئيس عبدالمومين راد، د ياد رياست ارشد مشاور حيات الله رحماني، د دعوت او ارشاد رئيس داد محمد بريال عطايي، د کبډي فدراسیون رئيس احمد فردين ضيايي، د ياد ولايت ورزشي امر انجنير مزمل نعيم زوی، ورزشکارانو او د ورزش ګڼو مينوالو ګډون کړی و.
په همدې اړه په جوړو شوو مراسمو کې د بدني روزنې او ورزش رياست فني او مسلکي رئيس عبدالمومين راد ګټونکو لوبډلو ته د مبارکۍ ترڅنګ يادې سيالۍ په زړه پورې سيالۍ وبللې او د يادو سيالیو د ودې او پراختيا په برخه کې يې له لوبغاړو سره د هر ډول اسانتياوو ژمنه وکړه.
هېره دې نه وي چې د يادو سياليو له څلورو لوبډلو خوست، فراه، هرات او لوګر ولايتونو څخه ۴۰ لوبغاړي وټاکل شول، چې په راتلونکې کې به د هيواد په کچه په نړيوالو سيالو کې ولوبېږي.
