د افغانستان د جودو فدراسیون رئيس د ای جي ایف نړيوال کانګرس په څنډه کې د جودو نړيوال فدارسیون له رئيس سره وکتل
د جودو نړيوال فدراسیون /ای جي ایف نړيوال ګانګرس ټاکنې، چې د دوحې په کوربتوب د مې میاشتې له څلورمې تر پنځمې نېټې ترسره شوې، د یاد فدراسیون پخوانی رئيس مایروس اېل ویزر پر خپل ځای او د سکرتر جنرال پر ځای نوې سکرتر جنراله لیزا الن وټاکل شوه.
د دې ګانګرس په ټاکنو کې د ۱۲۵ هیوادونو د جودو فدراسیون د استازو ترڅنګ د افغانستان د جودو فدارسیون رئيس ذبیح الله نظري هم ګډون کړی و، چې د یاد ګانګرس په ترڅ کې يې د یاد نړيوال فدراسیون له رئيس مایروس اېل ویزر سره وکتل او د افغانستان د جودو ورزش پر اړه يې ورسره خبرې وکړې.
په دې لیدنه کې د جودو نړيوال فدراسیون رئيس ښاغلي ویزر له افغانستان سره د همکارۍ ډاډ څرګند کړی او زیاته کړې یې ده، چې د افغانستان د جودو له فدراسیون سره به د توشکو او د یادې څانګې د سټنډرډ لباس په برخه کې همکاري وکړي او خپلو همکاریو ته به دوام ورکړي.
دغه راز د افغانستان د جودو فدراسیون رئيس په ورته ډول د یاد فدراسیون د لوبڅارانو له نړيوال مشر فلوران ډينال لوکوسو سره لیدنه وکړه، د افغان لوبڅارانو شته ستونزې يې ورسره شریکې کړې او د همکاریو غوښتنه يې ترې وکړه.
د یادې لیدنې پرمهال د یاد فدراسیون د لوبڅارانو نړيوال مشر له افغان لوبڅارانو سره د مرستې پر دوام د ټينګار ترڅنک وویل، چې دوی به په راتلونکي کې د افغان لوبڅارانو لپاره د ظرفیت لوړونې شپږ مياشتني پروګرامونه جوړوي، افغانستان ته به راځي او د ورزش ادارې په همکارۍ به ټولو ولایتونو ته په منظم ډول خپل سفرونه کوي.
باید یادونه وشي، د جودو نړيوالې سیالۍ چې د مې میاشتې پر اوومه نېټه پیل شوي او د دې میاشتې تر ۱۴ نېټې به دوام وکړي، د هیواد د جودو فدراسیون رئیس زبیح الله نظر هم پکې ګډون لري.
