په بادغیس کې د اوو لوبډلو ترمنځ د والیبال جام سیالۍ پیل شوې
د بادغیس ولایت د بدني روزنې او سپورت آمریت او د والیبال فدراسیون په همکارۍ د دې ولایت په ورزشي جمنازیوم کې د اوو لوبډلو ترمنځ د والیبال جام سیالۍ پیل شوې.
په دې سياليو کې د باختر، حماسه، کوهستان، لنګر، اتحاد، اتفاق او الماس لوبډلو برخه اخيستې چې د دوو اوونیو په اوږدو کې به د یو بل په وړاندې ۱۳ لوبې وکړي.
د ټورنمنټ لومړۍ لوبه د حماسه او باختر د لوبډلو تر منځ ترسره شوه چې په پایله کې د حماسه لوبډلې خپلې سیالې لوبډلې ته د ۳-۱ میدانونو په توپیر ماتې ورکړه.
د دې سیالیو موخه ورزش ته د ځوانانو هڅول دي.
