ننګرهار؛ په روداتو ولسوالۍ کې د دودیزو لوبو نمایشات تر سره شول
د ننګرهار ولایت د بدني روزنې او ورزش ریاست په همغږۍ روداتو ولسوالۍ په بړو سیمه کې د دودیز لوبو د بیا دود او را ژوندي کولو په موخه د دودیزو لوبو نمایشات تر سره شول.
په دغو نمايشونو کې د رسۍ کشولو او غشي ويشتلو سيالۍ ترسره شوې، چې په پيل کې د استاد شهاب او وحيد لوبډلو ترمنځ د رسۍ کشولو سيالۍ وشوه، چې د شهاب لوبډلې مقابله لوبډله تر ټاکلي ځاى پورې کش کړه او بريا يې وګټله.
د دغو نمايشونو په دويمه برخه کې د غشي ويشتلو سيالۍ هم ترسره شوه.
د سيمي خلکو چې په دغو نمايشونو کې يې برخه اخيستې د دوديزو لوبو په بيا را ژوندي کولو يې خوښي څرګنده کړه، چې له کلونو وروسته يو ځل بيا سيمه ييزې دوديزې لوبې راژوندۍ کيږي.
دا په داسې حال کې ده، چې د هېواد د بدني روزنې او ورزش عمومي ریاست هڅه کوي ترڅو ټولو هغو دوديزو لوبو بيا را ژوندي کولو ته کار وکړي، چې پخوا به کېدلې او اوس مهال يې ځاى نورو ورزشونو نيولى او د خلکو له ذهنه هم وتلې دي.
