نیمروز؛ د ۴۰ تنو ورزشکارانو ترمنځ د پانکریشن سیالۍ ترسره شوې
د نیمروز ولایت د بدني روزنې او سپورت ادارې او د دغه ولایت د پانکرېشن فدراسیون له لوري په مرکز زرنج ښار کې د ۲۰ جوړو او ۴۰ تنو ورزشکارانو ترمنځ د پانکریشن ورځنۍ سیالۍ ترسره شوې.
په دې سیالیو کې د پانکرېشن د دوو ورزشي کلپونو ورزشکارانو په بېلابېلو وزنونو، د ماشومانو، تنکیو ځوانانو او ځوانانو په عمري ډلبندیو کې برخه اخیستې وه.
د يادونې وړ ده، چې په دې سياليو کې د نيمروز ولايت د ورزش مسوولينو، روزونکو، ورزشکارانو او د دې برخې ګڼ شمېر مينوالو ګډون کړى و.
د دې سیالیو د ترسره کولو موخه د ورزش وده، پراختیا او د ملي لوبډلې په سیالیو کې د ګډون لپاره د غوره استعدادونو او غوره شخصیتونو پېژندل وو.
په پای کې غوره لوبغاړو ته مډالونه او ډالۍ ورکړل شوې.
