په بادغېس کې د سلګونو پهلوانانو ترمنځ د رستمي غېږنيونې سيالۍ ترسره شوې
د بادغیس ولايت د بدني روزنې او ورزش امريت له لوري د همدې ولايت په مرکز قلعه نو ورزشي لوبغالي کې له ۲۰۰ زياتو پهلوانانو ترمنځ د رستمي غېږ نيونې، رسۍ کشولو او تېږې اچونې سيالۍ ترسره شوې.
په همدې موخه په جوړو شويو مراسمو کې د مرکزي ادارې اړوند د ملي او دوديزو لوبو د امريت پلاوي، د نوموړي ولايت ورزشي مسوولينو او کارکوونکو، ورزشکارانو او د ورزش سلګونو مينوالو ګډون کړی و.
د يادو سياليو په اوږدو کې د رستمي غېږنيونې، رسۍ کشولو او تېږې اچونې سيالۍ ترسره شوې او ګټونکو ورزشکارانو ته چمتو شوې ډالۍ ورکړل شوې.
دا سيالۍ په داسې حال کې ترسره کېږي، چې د ورزش مرکزي ادارې د ملي او دوديزو لوبو امريت پلاوی ياد ولايت ته د ملي او دويزو لوبو د ظرفيت لوړونې په موخه تللی او په ياده برخه کې يې د ملي او دوديزو لوبو سمينار او ورکشاپ وړاندې کړي دي.
