ننگرهار؛ بختيار کلب لوبډلې د سمير جام په نوم د واليبال سياليو اتلولي وگټله
د ننگرهار ولايت د بدني روزنې او سپورټ رياست اړوند د واليبال فدراسيون د استازولۍ له لوري په بهسودو ولسوالۍ کې د ۲۸ لوبډلو تر منځ د سمير جام په نوم د واليبال سيالۍ د بختيار کلب لوبډلې په اتلولۍ پای ته ورسېدې.
د يادو سياليو پايلوبه د بهسودو منتخبې او بختيار کلب لوبډلو تر منځ ترسره شوه، چې په پايله کې د بختيار کلب لوبډلې خپلې سیالې لوبډلې ته د ۲/۳ مېدانونو په توپير ماتې ورکړه او اتلولۍ يې خپله کړه.
د دغو سياليو د ترسراوي موخه د ځوانانو تر منځ يووالی او له نظام څخه ملاتړ ياده شوی و، چې ۱۵ ورځې يې دوام وکړ.
په پای کې ګټونکې لوبډلې ته د اتلولۍ جام او غوره لوبغاړو ته چمتو شوې ډالۍ ورکړل شوې.
