د هیواد د ورزش ادارې عمومي رئیس مولوي احمد الله وثیق د فوټبال ملي لوبډلې له روزونکي اشلي ویسټ ووډ او لوبډلمشر سره ولیدل
د المپیک ملي کمېټې او سپورټ عمومي رئیس مولوي احمد الله وثیق د فوټبال ملي لوبډلې له انګلستاني روزونکي اشلي ویسټ ووډ او لوبډلمشر اسلام الدین امیري سره ولیدل،په دې لیدنه کې، چې په فوټبال ملي فدراسیون کې ترسره شوه، د بدني روزني او سپورټ عمومي رياست او فوټبال فدراسیون فني مرستیال حافظ احمد جان ځدراڼ هم ګډون کړی و.
ښاغلي وثیق په دې لیدنه کې د اشلي ویسټ ووډ هڅې وستایلې او له خپل اړخه یې پوره ډاډ ورکړ، چې تر خپلې وسې پورې به اسانتیاوې ورته برابروي. همدا ډول یې د فوټبال ملي لوبډلې د لوبډلمشر اسلام الدین امیري هڅې، لوبې او لاسته راوړنې د قدر وړ وبللې.
په دې ناسته کې د ورزش ادارې د عمومي رئیس له خوا په هیواد کې د وروستیو ورزشي بریاوو یادونه هم وشوه، له اسیایي المپیکي لوبو څخه پر مډالونو ګټلو بحث وشو او هم د فوټسال ملي لوبډلې وروستۍ ستره بریا د پام وړ او مهمه وبلل شوه.
د ناستې په پای کې د ښاغلي وثیق له خوا د فوټبال ملي لوبډلې انګلستاني روزونکي اشلي ویسټ ووډ ته له افغاني دود سره سم، چپن ور واغوستل شوه او هم ورته د بدني روزنې او سپورټ عمومي ریاست ورزشي لباس ډالۍ شو.
