لوگر؛ څرخ ولسوالۍ لوبډلې د پسرلني جام په نوم د واليبال سياليو اتلولي وگټله
د لوگر ولايت د بدني روزنې او سپورټ امريت اړوند د واليبال فدراسيون د استازولۍ له لوري د مرکز پل علم ښار په دولتي جمنازيوم کې د مرکز او ولسوالیو په کچه د ۳۲ لوبډلو ترمنځ د پسرلني جام په نوم د واليبال سيالۍ د څرخ ولسوالۍ لوبډلې په اتلولۍ پای ته ورسېدې.
د يادو سياليو په پايلوبه کې څرخ ولسوالۍ لوبډلې سيالې پيروزي کلنگار لوبډلې ته ۱/۳ ميدانونو په توپير ماتې ورکړه او اتلولي يې خپله کړه.
دغه سیالۍ چې ورزش ته د ځوانانو هڅولو او يووالي په موخه ترسره شوې، شاوخوا يوه نيمه مياشت يې دوام وکړ.
د يادونې وړ ده، چې پای کې د النور توليدي او صنعتي شرکت له لوري اتلې لوبډلې ته ۱۵٫۰۰۰ زره افغانۍ او دويم مقام گټونکې لوبډلې ته ۱۰٫۰۰۰ زره افغانۍ د انعام په توگه ورکړل شوې.
