پکتيکا؛ په ۲۰۳ منصوري قول اردو کې د پنځو لوبډلو ترمنځ د ټېپ بال کرکټ سيالۍ پای ته ورسېدې
د پکتيکا ولايت د بدني روزنې او سپورټ امريت او د ۲۰۳ منصوري پلې لېوا تعليم او تربيې امريت په گډه همکارۍ د منصوري قول اردو په دويمې لېوا ميدان کې د پنځو لوبډلو ترمنځ د ټېپ بال کرکټ سيالۍ د څلورم کنډک لوبډلې په اتلولۍ پای ته ورسېدې.
د يادو سياليو پايلوبه د څلورم او پنځم کنډکونو لوبډلو ترمنځ ترسره شوه، څلورم کنډک لوبډلې د لوبې پچې په گټلو سره په ټاکلو لسو اورونو کې د شپږو لوبغاړو په سوځېدو سره سیالې لوبډلې ته د ۱۴۸ منډو هدف کېښود، پنځم کنډک لوبډلې ياد هدف ترلاسه نه کړ او د ۳۰ منډو په توپیر یې ماته ومنله.
د يادونې وړ ده، چې دغو سياليو شاوخوا يوه مياشت دوام وکړ او په پای کې د دويمې لېوا مسؤلینو له لوري غوره لوبغاړو ته مډالونه ورکړل شول.
