کابل کې د ۱۰۲ ورزشکارانو ترمنځ د سوک وهنې سیالۍ پای ته ورسېدې
د المپيک، بدني روزنې او ورزش لوی ریاست اړوند د سوک وهنې ملي فدراسیون له لوري د یاد فدراسیون په جمنازیوم کې د هېواد د سوک وهنې ملي اتل مرحوم استاد عبدالغفور رغبت په یاد کې د ۱۰۲ ورزشکارانو ترمنځ د سوک وهنې دوه دېرشم پړاو سیالۍ پای ته ورسېدې.
دغه سیالۍ، چې د نوي ځوانانو په عمري کټګورۍ او د ۴۶ څخه تر ۸۰ کیلوګرام وزن کې ترسره شوې، په پایله کې ۵۱ تنه غوره ورزشکاران وپېژندل شوه.
د دغو سیالیو پرانیستغونډې ته د المپیک، بدني روزنې او ورزش لوی ریاست فني او مسلکي معاون حافظ احمدجان ځدارڼ، د یاد ریاست ورزشي مشاور قاري حیات الله رحماني، ورزشکاران او زیات شمېر مینوال راغلي وو.
هېره دې نه وي دغو سیالیو دوې ورځې یې دوام وکړ او موخه یې د استاد عبدالغفور رغبت یاد را ژوندي کول و.
د سیالیو په پای کې د سوک وهنې ملي فدراسیون د رهبري له لوري غوره ورزشکارانو ته مډالونه او د اتلولۍ حکمونه ورکړل شوه.
