ننگرهار؛ په سپين غر ولسوالۍ کې د ۳۰ لوبډلو ترمنځ د واليبال سيالۍ پای ته ورسېدې
د ننگرهار ولايت د بدني روزنې او سپورټ رياست اړوند د شينوارو شپږگونو ولسواليو ورزشي مديريت له لوري د سپين غر ولسوالۍ په چهلگزي کلي کې د ۳۰ لوبډلو ترمنځ د هېواد بيارغونې په موخه د واليبال سيالۍ د سپين غر لوبډلې په اتلولۍ پای ته ورسېدې.
د يادو سياليو په پايلوبه کې سپين غر لوبډلې خپلې سيالې انځري لوبډلې ته د ۰/۳ ميدانونو په توپير ماتې ورکړه او اتلولي يې خپله کړه.
د يادونې وړ ده، چې دغو سياليو دوې اوونۍ دوام وکړ او په پای کې اتلې لوبډلې ته د اتلولۍ جام ورکړل شو.
