خوست کې د ۴۰ لوبډلو ترمنځ د ټېپ بال کرکټ سيالۍ پيل شوې
د خوست ولايت د بدني روزنې او ورزش امريت اړوند د ټېپ بال کرکټ فدراسيون د استازولۍ له لوري د ياد ولايت په مرکز ورغه کلي کې د ۴۰ لوبډلو ترمنځ د ټېپ بال کرکټ سيالۍ، چې شاوخوا يوه نيمه مياشت به دوام وکړي، د مهدي خېلو لوبډلې په بريا پيل شوې.
د يادو سياليو لومړنۍ لوبه د مهدي خېلو او خوشحال درمان لوبډلو ترمنځ ترسره شوه، چې خوشحال درمان لوبډلې د لوبې پچې په گټلو سره په ټاکلو لسو اورونو کې د نهو لوبغاړو په سوځېدو سره سیالې لوبډلې ته د ۸۴ منډو هدف وټاکه، په مقابل کې مهدي خېلو لوبډلې ياد هدف په اتم اور کې ترلاسه کړ او د شپږو ويکټو په توپير يې بريا خپله کړه.
