پکتيا کې د درېيو ولايتونو ترمنځ د معارف جام په نوم د سوک وهنې دوستانه سيالۍ ترسره شوې
د پکتيا ولايت د بدني روزنې او ورزش رياست اړوند د سوک وهنې فدراسيون د استازولي له لوري د مرکز گرډېز ښار په ورزشي جمنازيوم کې د درېيو ولايتونو د ۶۰ تنو ورزشکارانو ترمنځ د معارف جام په نوم د سوک وهنې دوستانه سيالۍ ترسره شوې.
په يادو سياليو کې له لوگر، خوست او کوربه پکتيا ولايتونو څخه ورزشکارانو د تنکيو ځوانانو، نويو ځوانانو، ځوانانو او مشرانو په عمري کټگوريو کې گډون کړی وو، چې په پايله کې پکتيا ولايت ورزشکارانو لومړی مقام خپل کړ.
د يادولو وړ ده، چې د دغو سياليو د ترسره کېدو موخه ورزش ته د ځوانانو هڅول او د غوره ورزشکارانو موندل وو، چې يوه ورځ يې دوام وکړ او په پای کې غوره ورزشکارانو ته ستاينليکونه او چمتو شوې ډالۍ ورکړل شوې.
