کابل؛ د هېواد ورزش ادارې د بدن ښکلا اسيايي سياليو کې مډال ګټونکي ورزشکاران وستایل
د المپيک، بدني روزنې او ورزش عمومي رياست د ټايلنډ په کوربتوب د بدن ښکلا ۵۷م پړاو اسیایي سیالیو کې مډال ګټونکي ورزشکاران د يوې ځانګړې غونډې په ترڅ کې وستایل.
په دغه ستاينغونډه کې د هېواد ورزش ادارې عمومي رئيس مولوي احمدالله وثيق، د دې ادارې د المپيکي چارو رئيس داد محمد پاينده اختري، د المپيک ملي کمېټې مرستيال او د بدن ښکلا فدراسيون رئيس باور خان هوتک، د دې ادارې د نشراتو رئیس اتل مشواڼي، د فني او مسلکي ریاست سرپرست حمیدالله صافي، ورزشکارانو او د رسنيو استازو ګډون کړی و.
په دغه ستاينغونډه کې د هېواد ورزش ادارې د المپيکي چارو رئيس داد محمد پاينده اختري د وينا پر مهال، د يادې لاسته راوړنې مبارکي ټولو هېوادوالو او ورزشکارانو ته وويله او دغه لاسته راوړنه يې د ورزشکارانو او رهبرۍ د نه ستړې کېدونکو هڅو پايله وګڼله.
دغه راز نوموړي له ورزشکارانو څخه وغوښتل لکه څرنګه، چې د هېواد لپاره د وياړونو په لاسته راوړنه کې کوښښ کوئ، دغه راز په نړيوالو سټيجونو کې د يو بل منلو، يووالي او غوره اخلاقو سمبول هم اوسئ.
د بدن ښکلا اسيايي سياليو ۵۷م پړاو کې ياسر سمير احسان په دوه وزني کټګوريو ( مثبت ۷۵ او ۱۰۰ کيلو ګرامه), نائب مبارز په ۸۵ کيلو ګرامه او بيت الله ځدراڼ په منفي ۷۵ کيلو ګرامه وزنونو کې د برنزو مډالونه وګټل.
د ويلو ده، چې يادې سيالۍ د افغانستان په ګډون د ۲۸ هېوادونو ترمنځ د ټایلنډ هېواد په بنکاک ښار کې ترسره شوې، چې له افغانستان څخه پکې ۶ ورزشکارانو او يوه روزونکي ګدون کړی و.
