خوست کې د لسو لوبډلو ترمنځ د والیبال غوره لیګ دویم پړاو سیالۍ پیل شوې
د خوست ولایت د بدني روزنې او ورزش آمریت اړوند د والیبال فدراسیون سره په همغږي د اسماعیل سالار په مالي ملاتړ د یاد ولایت مرکز اړوند شیخ زاید ورزشي جمنازیوم کې د لسو لوبډلو ترمنځ د خوست جام په نوم د والیبال غوره لیګ دویم پړاو سیالۍ پیل شوې.
دغو سیالیو کې درې لوبډلو له کابل، دوو لوبډلو له کوزې پښتونخواه او پنځو لوبډلو له خوست ولایت څخه ګډون کړی دی، چې په لومړۍ لوبه کې یې د کوزې پښتونخواه سالار لوبډلې د ۳ پر یو میدان په توپیر خپلې سیالې کابل وطندوست لوبډلې ته ماتې ورکړه او د سیالیو لومړۍ بریا یې خپله کړه.
ټاکل شوې، چې دغه سیالۍ به دوې میاشتې دوام وکړي.
