د غزني مرکز کې د ۳۲ لوبډلو ترمنځ د فوټسال سيالۍ پيل شوې
د غزني ولايت د بدني روزنې او ورزش امريت اړوند د فوټبال ملي فدراسيون د استازولۍ له لوري د ياد ولايت له مرکز او ولسواليو څخه د ۳۲ غوره لوبډلو او الف او ب لوبډلو ترمنځ د غزني کپ په نوم د فوټسال سيالۍ پيل شوې.
د دغو سياليو په لومړۍ لوبه کې پديده خورشيد لوبډلې خپلې سيالې الماس لوبډلې ته د ۴/۳ ګولونو په توپير ماتې ورکړه او لومړۍ بريا يې خپله کړه.
د يادو سياليو موخه د لوبغاړو ترمنځ يووالی رامنځته کول، د راتلونکي ليګ لپاره غوره لوبډلې چمتوالی، ورزش دودول او له نشه يي توکو څخه د ځوانانو لېري والی دی.
