بلخ کې د ۱۰۰ ورزشکارانو ترمنځ د موی تای اتلولۍ سیالۍ وشوې
د بلخ ولایت د بدني روزنې او ورزش ریاست اړوند د موی تای ملي فدراسیون د استازولۍ له لوري په یاد ولایت کې د ۱۰۰ ورزشکارانو ترمنځ په تنکیو ځوانانو، نویو ځوانانو، ځوانانو او د لویانو ورزشکارانو په عمري کټګورو کې د موی تای اتلولۍ سیالۍ وشوې، چې یوه ورځ یې دوام وکړ.
دغه سیالۍ د تک فایټ په ډول ترسره شوې، چې په پایله کې ۵۰ ورزشکارانو خپلو سیالانو ته په ماتې ورکولو سره بریاوې او د اتلولۍ مقامونه خپل کړل.
د یادو سیالیو موخه د موی تای ورزش ته وده ورکول و؛ د سیالیو په پای کې غوره ورزشکارانو ته چمتو شوې ډالۍ ورکړل شوې.
