د المپيک، بدني روزنې او ورزش عمومي رييس او ورسره پلاوي د ننګرهار ولايت د مختلفو ورزشي فدراسيونونو له استازو سره وکتل
د المپيک بدني روزنې او ورزش عمومي رييس مولوي احمدالله وثيق، د ياد رياست فني او مسلکي مرستيال حافظ احمدجان ځدران، د المپيکي چارو رييس داد محمد پاينده اختري، د بدن ښکلا فدراسيون ريیس باور هوتک او ورسره پلاوي ننګرهار ولايت ته د خپل سفر په ترڅ کې د مختلفو ورزشي فدراسيونونو له استازو سره وکتل او د هغوی ستونزې يې واورېدې.
په پيل کې د ياد ولايت د مختلفو ورزشي فدراسيونونو استازو خپلې لاسته راوړنې، ستونزې او غوښتنې شريکې کړې او د ورزش د لا ښې ودې په موخه يې خپل نظریات وړاندې کړل.
ورپسې د المپيک، بدني روزنې او ورزش عمومي رييس مولوي احمدالله وثيق خبرې وکړې، د دوی د ښو کړنو ستاينه يې وکړه او په ټوله کې يې د ورزش په برخه کې د دوی د هڅو قدرداني وکړه، ښاغلي وثيق همداراز زياته کړه، ورزش اداره تل هڅه کوي چې د مرکز او ولايتونو ترمنځ په ورزشي برخه کې اسانتياوې رامنځته کړي. هغه وويل موږ ستاسو ستونزې درک کوو او هڅه کوو چې تر خپل توان پور ستاسو ستونزو ته رسېدنه وکړو او حل يې کړو.
