د ورزش ادارې عمومي رئیس مولوي احمد الله وثیق د اندونیزیا د ورزش او ځوانانو وزارت له مرستیال وزير سره ولیدل
د المپیک، بدني روزنې او ورزش عمومي رئیس مولوي احمد الله وثیق اندونیزیا ته د رسمي سفر په جریان کې د نوموړي هیواد د ورزش او ځوانانو وزارت له مرستیال توفیق هدایت سره ولیدل، چې په دغه لیدنه کې د افغانستان سفیر مولوي سعدالله بلوچ هم شتون درلود.
د لیدنې پر مهال ښاغلي توفیق هدایت د افغانستان د ورزش ادارې رئیس ته ښه راغلاست ووایه او یاد هیواد ته ورتګ یې د ورزشي اړیکو د پراختیا په برخه کې مهم اقدام وباله.
همداراز په دغه ناسته کې د دواړو هیوادونو د ورزشي اړیکو پر پراختیا خبرې وشوې او هالته د مېشتو افغان ورزشکارانو لپاره د تمریناتي کمپونو پر برابرولو، د اندونیریا هیواد په لیګونو کې د افغان ورزشکارانو پر لوبېدو هم د نظرونو تبادله وشوه.
د لیدنې په جریان کې د اندونیریا د ورزش وزارت مرستیال وزير وويل، چې په مناسب وخت کې به د ورزشي اړیکو د لا پراختیا په موخه افغانستان ته سفر وکړي.
