د يما پطرول افغانستان وزلوبې ليگ اووم پړاو سياليو په درېيمه ورځ درې سیالۍ وشوې
د المپيک، بدني روزنې او ورزش عمومي رياست په همکارۍ او د وزلوبې، نيزه وهنې او سيمه ييزو لوبو ملي فدراسیون له لوري د کابل ښار په يکه توت لوبغالي کې د ۱۱ لوبډلو ترمنځ د يما پطرول افغانستان ليگ اووم پړاو سياليو درېيمه ورځ د سرپل، بلخ او تخار لوبډلو په برياوو پای ته ورسېده.
د يادو سياليو په اوومه لوبه کې سرپل لوبډلې خپلې سيالې پنجشېر لوبډلې ته د ۱۳ پر ۱ امتيازونو په توپير، اتمه لوبه کې بلخ لوبډلې سيالې فارياب لوبډلې ته د ۵ پر ۱ امتيازونو په توپير او نهمه لوبه کې بيا تخار لوبډلې خپلې سيالې باميان لوبډلې ته د ۱۲ پر ۱ امتيازونو په توپير سره ماتې ورکړې او بریاوې يې خپلې کړې.
د ويلو ده، چې د يما پطرول؛ افغانستان وزلوبې ليگ اووم پړاو سيالۍ به د بهرنيو لوبغاړو په گډون د کندز، فارياب، بلخ، بدخشان، تخار، باميان، سرپل، پنجشير، سمنگان، بغلان او هرات لوبډلو ترمنځ ترسره کېږي، چې نهه ورځې به نور هم دوام ومومي.
