غزني کې د ۷۰ ورزشکارانو ترمنځ د رزمي لوبو د هوشارافو سبک سیالۍ ترسره شوې
د غزني ولایت د بدني روزنې او ورزش امریت اړوند د رزمي لوبو ملي فدراسیون د استازولۍ له لوري په یاد ولایت کې له کابل، ننګرهار، میدان وردګ، پکتیا، لوګر او غزني ولایتونو د ۷۰ ورزشکارانو ترمنځ د رزمي لوبو د هوشارافو سبک سیالۍ ترسره شوې.
دغه سیالۍ د نویو ځوانانو، ځوانانو او د لویانو ورزشکارانو په عمري کټګوریو کې د تک فایټ په ډول ترسره شوې، چې په پایله کې ۳۵ ورزشکارانو خپلو سیالانو ته په ماتې ورکولو سره بریاوې او لومړي مقامونه ترلاسه کړل.
د یادو سیالیو موخه د ورزشکارانو ترمنځ یووالی رامنځته کول و، چې یوه ورځ یې دوام وکړ.
د سیالیو په پای کې غوره ورزشکارانو ته چمتو شوې ډالۍ ورکړل شوې.
