فاریاب کې د اتو لوبډلو ترمنځ د فوټسال سيالۍ د یاران سرخي لوبډلې په اتلولۍ پای ته ورسېدې
د فارياب ولايت د بدني روزنې او ورزش آمريت په همکارۍ او د فوټبال فدراسيون د استازولۍ له لوري د ياد ولايت په اندخوي ولسوالۍ کې د اتو لوبډلو ترمنځ د فوټسال سيالۍ، چې دوې اوونۍ مخکې پيل شوې وې د سرخي ياران لوبډلې په اتلولۍ پای ته ورسېدې.
دا سيالۍ په امتيازي ډول ترسره شوې، چې په پايله کې سرخي ياران لوبډلې د ډېرو امتيازونو په ترلاسه کولو سره لومړی، ځوانانو لوبډلې دويم او سادات لوبډلې بيا درېيم مقام خپل کړ.
د يادو سياليو موخه په فارياب ولايت کې د ورزشکارانو ترمنځ د فوټسال لوبې وده وه، چې په پای کې لوبډلو او غوره لوبغاړو ته چمتو شوې ډالۍ ورکړل شوې.
