مسکو؛ د ا.ا.ا سفیر مولوي ګل حسن " حسن " له افغان مډال ګټونکو ورزشکارانو سره وکتل
په مسکو کې د ا.ا.ا لوی سفیر مولوي ګل حسن حسن په خپل کاري دفتر کې له هغو افغان ورزشکارانو سره وکتل چې د افغانستان د ورزش ادارې د رئیس مولوي احمدالله وثیق په ملتیا روسیې ته تللي وو.
یاد پلاوی په مسکو کې د روسیې فدراسیون له لوري په جوړ شوي (د المپیکي مډال ګټونکو ځوانانو د تشویق اتم نړیوال فورم) کې د ګډون په موخه حضور درلود او د سفارت په بلنه یې له سفیر سره کتنه ترسره کړه.
په دې لیدنه کې ښاغلي سفیر د هېواد د استازیتوب له امله له ورزشکارانو مننه وکړه او ویې ویل چې ورزش د ملتونو ترمنځ د نږدېوالي او د هېواد د مثبت انځور د وړاندې کولو مهمه وسیله ده.
نوموړي هیله څرګنده کړه، چې افغان ورزشکاران به د خپلو لاسته راوړنو له لارې د افغانستان نوم لا روښانه کړي او په نړیوالو ډګرونو کې به د هېواد ښه استازیتوب وکړي.
د غونډې په پای کې، د ا.ا.ا لوی سفیر د ورزشکارانو د هڅو او لاسته راوړنو د ستاینې په موخه هغوی په ستاینلیکونو او ډالیو ونازول.
