میدان ودرګ؛ بهسودو حصه اول ولسوالۍ کې ورزشي او دودیزه ګډه مېله ترسره شوه
د میدان وردګ ولایت د بدني روزنې او ورزش آمریت او د یاد ولایت د اطلاعاتو او کلتور ریاست په ګډه همکاري د یاد ولایت په بهسودو حصه اول ولسوالۍ کې ورزشي او دودیزه ګډه مېله ترسره شوه.
په دغې مېله کې د میدان وردګ والۍ ملا خیرالله خیرخواه، قومي مشرانو، سپین ږیرو، ځوانانو او ګڼو ورزشکارانو ګډون کړی و، چې ورزشکارانو پکې د جمناستک او تکواندو نندارې ترسره کړې او همداراز د کتاب، لاسي صنایعو او د هېواد تاریخي سیمو بېلاېبل انځورونه نندارې ته وړاندې شول.
د میدان وردګ والي ملا خیرالله خیرخواه دا ډول فرهنګي، علمي او ورزشي میلې د ولسونو، قومونو او ځوانانو ترمنځ د یووالي او ورور ولۍ په برخه کې خورا اړینې او مهمې وګڼلې او له ولسونو یې وغوښتل چې د قومونو ترمنځ یووالی وساتي او هیچا ته اجازه ورنکړي چې د قومونو ترمنځ ستونزې او شخړې رامنځته کړي.
ښاغلي خیرخواه دغه راز د میدان وردګو له خلکو وغوښتل، چې د خپلو سیمو د امنیت د ټینګښت، ټولنیز نظم ساتلو او د ولسونو ترمنځ د یووالي په برخه د ا.ا.ا سره همکار پاتې شي.
دغه ورزشي او فرهنګي ګډه مېله د ولسونو د یووالي او د کلتوري ارزښت ساتلو په موخه ترسره شوه، چې یوه ورځ یې دوام وکړ.
