هرات کې د فزیکي روغتیا، رواني هوساینې او ورزشي مدیریت د پياوړتيا لومړنی پړاو علمي سيمینار ترسره شو
د هرات ولایت د بدني روزنې او ورزش ریاست له لوري د « ټولنې جسمي روغتیا ساتنې، رواني ارامۍ، مدیریتي انضباط او معنوي پاکوالي» په نوم لومړی پړاو ورزشي سمينار ياد ولايت کې د ورزشي فدراسیونونو مسؤلينو، د کلبونو استاذانو، روزونکو او ورزشکارانو په شتون کې پای ته ورسېده، چې دوې ورځې يې دوام وکړ.
دغه علمي سمینار د هرات ولایت د یوه خصوصي پوهنتون په تالار کې جوړ شوی و، چې د هرات ولايت له ۲۰۰ څخه زیاتو ورزشي فدراسیونونو مسؤلینو، د ورزشي کلبونو استاذانو، روزونکو او ورزشکارانو پکې ګډون کړی و.
په ياد علمي سمينار کې ګډون کوونکو د ورزشي علومو، ورزشي مدیریت، ورزشي ارواپوهنې او د ورزشکارانو د تغذیې پر اړه تخصصي موضوعات زده کړل.
د سمینار په پیل کې د هرات ولایت د بدني روزنې او ورزش رئیس مفتي عبدالرحیم رحماني د ورزشکارانو د فزیکي روغتیا پر اهمیت، د رواني ارامۍ پر پیاوړتیا، د ورزش په معنوي ارزښت، د ورزش د ودې او پراختیا اړوند خبرې وکړې.
