هلمند؛ مرکز لښکرګاه ښار کې د ١٦ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت مرکز لښکرګاه ښار کې د ١٦ لوبډلو ترمنځ د ټېپ بال کرېکټ سیالۍ د افضلي اتلانو لوبډلې په اتلولي پای ته ورسېدې.
د یادو سیالیو پایلوبه د رویال او افضلي اتلانو لوبډلو ترمنځ ترسره شوه. د لوبې پچه رویال لوبډلې وګټله او لومړی یې توپ وهنه وکړه، چې په ټاکلو لسو اورونو کې یې خپلې سیالې لوبډلې ته د ١٢٤ منډو هدف وټاکه. افضلي اتلانو لوبډلې ټاکلی هدف د درېیوو ویکټو په زيان د لوبې په وروستي اور کې ترلاسه کړ او د اوو ویکټو په توپیر یې د دغو سیالیو اتلولي وګټله.
دا سیالۍ د ځوانانو ترمنځ د یووالي په موخه ترسره شوې، چې ٢٠ ورځې یې دوام وکړ.
