پکتيکا؛ گومل ولسوالۍ کې د ۱۴ لوبډلو ترمنځ د ټېپ بال کرېکټ سيالۍ پای ته ورسېدې
د پکتيکا ولايت د بدني روزنې او ورزش آمريت په همغږۍ، د ټېپ بال کرېکټ فدراسيون د استازولۍ له لوري د ياد ولايت په گومل ولسوالۍ کې د ۱۴ لوبډلو ترمنځ د ټېپ بال کرېکټ سيالۍ د شېر گل خان لوبډلې په اتلولۍ پای ته ورسېدې.
د يادو سياليو پايلوبه د شېر گل خان او خېرمينځو لوبډلو ترمنځ وشوه، د لوبې پچه خېرمينځو لوبډلې وگټله او لومړی يې د توپ وهنې پرېکړه وکړه، چې په ټاکلو ۷ اورونو کې يې د ۵ لوبغاړو په سوځېدو سره خپلې سيالې لوبډلې ته د ۱۰۰ منډو هدف کېښود، په ځواب کې شېر گل خان لوبډلې ياد هدف د لوبې په ۷م اور کې ترلاسه کړ او د ۷ ويکټو په توپير يې بريا خپله کړه.
دا سيالۍ د ځوانانو ترمنځ د يووالي په موخه ترسره شوې او ۱۱ ورځې يې دوام وکړ.
