پکتیکا؛ یوسف خېلو ولسوالۍ کې د ٢٦ لوبډلو ترمنځ د ټېپ بال کرېکټ سیالۍ پیل شوې
د پکتیکا ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت په یوسف خېلو ولسوالۍ کې د ٢٦ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د کټواز واریرز او خواجه بابا لوبډلو ترمنځ ترسره شوه. د لوبې پچه کټواز واریرز لوبډلې وګټله او لومړی یې توپ وهنه وکړه، چې په ټاکلو اووه اورونو کې یې د شپږو ویکټو په زیان خپلې سیالې لوبډلې ته د ١٥١ منډو هدف وټاکه. خواجه بابا لوبډلې د هدف په تعقیب کې د څلورو ویکټو په زیان ١٤٨ منډې وکړې او د درېیوو منډو په توپیر یې لوبه وبایلله.
دا سیالۍ ورزش ته د ځوانانو لپاره د سالمې تفریح برابرولو په موخه پیل شوي دي، چې یوه میاشت به دوام وکړي.
