کابل؛ د هېواد ورزش ادارې د ځغاستې لوبغاړی وکيل احمد پکتين وستايه
د المپيک، بدني روزنې او ورزش عمومي رياست د ځغاستې لوبغاړی وکيل احمد پکتين، چې له کندهار څخه يې تر کابل پورې نږدې ۵۰۰ کيلومتره واټن په ځغاستې سره په شپږو ورځو کې طی کړی و، د يوې ځانګړې غونډې په جوړولو سره وستایه.
په دغه ستاينه غونډه کې چې د هېواد ورزش ادارې پر رهبرۍ سربیره ملي سوداګرو او ورزشي مسولينو هم ګډون کړی و، د هېواد ورزش ادارې عمومي رئيس مولوي احمدالله وثیق ټولو ته د ښه راغلاست ترڅنګ د ښاغلي پکتين پر دغه کارنامه او لاسته راوړنه خوښې وښوده د دغې لاسته راوړنې مبارکي يې ښاغلي پکتين او ټولو هېوادوالو ته وويله.
دغه راز ښاغلي وثيق زياته کړه چې موږ ته د هر ورزشکار وړه کړنه هم د قدر وړ ده او موږ يې ستاينه کوو.
همدارنګه ملي سوداګر ميرويس وزيرزي کټوازي په خپلو خبرو کې د هېواد ورزش ادارې له رهبرۍ مننه وکړه، چې تل يې زيار ايستلی او د هرې برخې ورزشکاران يې ستايلې دي او ترڅنګ يې د پکتين د دغه لاسته راوړنې مبارکي ټولو مسوولينو او ښاغلي پکتين ته وويله.
د يادې ستاينغونډې په پای کې د هېواد ورزش ادارې او د ملي سوداګر ميرويس وزيرزي کټوازي له لوري ښاغلي پکتين ته د نغدي ډاليو ترڅنګ نورې ډالۍ هم ورکړل شوې.
د ويلو ده چې ښاغلي پکتين له دې وړاندې هم له پکتیکا ولایت له مرکز څخه تر غزني ولايت پورې ۶۲ کيلومتره واټن په ځغاسته طی کړی و.
