کندز؛ امام صاحب ولسوالۍ کې د کورش شپنۍ سيالۍ وشوې
د کندز ولايت د بدني روزنې او ورزش رياست په همکارۍ او د سامبو کورش فدراسيون د استازولۍ له لوري د امام صاحب ولسوالۍ اړوند آقي بای سیمه کې د ۸۵ پهلوانانو ترمنځ د کورش آزادې سيالۍ وشوې.
په دغو سياليو کې پر کندز سربيره له جوزجان څخه پهلوانانو گډون کړی وو، چې ۴۲ تنو خپلو سيالانو ته په ماتې ورکولو سره برياوې خپلې کړې او همدارنگه کندز پهلوانانو د زياتو برياوو په خپلولو سره لومړی مقام خپل کړ.
دا سيالۍ ملي او دوديزو لوبو ته د ودې ورکولو او د يادې ولسوالۍ وگړو لپاره د سالمې تفريح برابرولو په موخه ترسره شوې، چې يوه شپه يې دوام وکړ.
